ღვინის გაყალბება ქართული მეღვინეობის ერთ-ერთ უმთავრეს პრობლემას წარმოადგენს, გაყალბებული ღვინის ამოცნობა კი ღვინის მოყვარულებისვის უმნიშვნელოვანესია. გთავაზობთ საერთაშორისო ქიმიური საზოგადოების წევრის, რამაზ გახოკიძის მიერ მოკვლეულ ნაყალბევი ღვინის ამოცნობის რამდენიმე ხერხს, რომელთა გამოყენებაც ნებისმიერ ადამიანს შეუძლია.

1. ღრმა თასი გაავსეთ წყლით, მოათავსეთ ღვინო მცირე ზომის სინჯარაში ან რომელიმე ვიწროყელიან ჭურჭელში. სინჯარას დააფარეთ თითი და ჩადეთ წყალში. შემდეგ მოაცილეთ თითი. სუფთა ღვინო არ უნდა შეერიოს წყალს განსხვავებული სიმკვრივის გამო. სასმელი თუ შეღებავს წყალს, მაშინ იგი ფალსიფიცირებულია.

2. ღვინოს დაამატეთ გლიცერინი (ხუთი/ერთთან თანაფარდობით) და დაელოდეთ ჭიქის ძირზე ნალექის წარმოქმნას. ღვინო თუ ხარისხიანია, ცვლილება არ ხდება, თუ გაყალბებულია, მაშინ გლიცერინი იძენს ყვითელ, წითელ ან იისფერ ელფერს.

3. ბოთლი მკვეთრი მოძრაობით გადაატრიალეთ ყელით ქვევით და პირუკუ. გავხედოთ სინათლეზე. ბევრი ნალექის წარმოქმნა ღვინის ცუდ ხარისხზე მიუთითებს. მაღალი ხარისხის ღვინო, ჩვეულუბრივ, შეიცავს მცირე რაოდენობით ღვინის ქვის ნალექს, რომელიც შენჯღრევის შემდეგ სწრაფად ილექება ფსკერზე.

4. ბოთლი შეანჯღრიეთ როგორც ზემოთ არის ნაჩვენები და ღვინო ჩამოასხით ბოკალებში. ყურადღება მიაქციეთ ქაფს. ხარისხიან ღვინოში იგი ცენტრში გროვდება და სწრაფად ქრება. სასმელი თუ ყალბია, მაშინ ქაფი დიდხანს ილექება კედლებზე.

5. ჯამში ჩაყარეთ მცირე რაოდენობით სოდა და დაასხით ჩაის კოვზი წითელი ღვინო. ხარისხიანი ღვინის ფერი შეიცვლება, გამუქდება, რუხი ან მოცისფრო გახდება.

6. ღვინოში ხელოვნური საღებავის აღმოსაჩენად ცარცზე დააწვეთეთ რამდენიმე წვეთი ღვინო და დააყოვნეთ. გაშრობის შემდეგ ლაქა თუ გაუფერულდა, ღვინო ხელოვნურ საღებავებს არ შეიცავს, ხოლო ლაქამ თუ ფერი არ შეიცვალა, მაშინ საღებავებს შეიცავს.

allwine.ge

დატოვეთ კომენტარი

კომენტარები

Загрузка...