„პარიზელი მსროლელი“ აბდელჰაკიმ დეკარი სასამართლომ პარიზში მედიასაშუალებების რედაქციებზე თავდასხმაში დამნაშავედ ცნო და 25-წლიანი პატიმრობა მიუსაჯა. ამის შესახებ „ფრანს პრესი“ იუწყება.

2013 წლის ნოემბერში უცნობი მამაკაცი გაზეთ Liberation-ის რედაქციაში შეიჭრა და ცეცხლი გახსნა, რის შედეგადაც მძიმე დაიჭრა ფოტოგრაფის ასისტენტი. გარდა ამისა, ის შეიჭრა ტელეარხ BFMTV-ს ოფისში, მაგრამ სროლა არ დაუწყია და ჟურნალისტებს მხოლოდ იარაღით დაემუქრა და მიიმალა.

რამდენიმე ხანში ამავე ადამიანმა ცეცხლი პარიზის შემოგარენში, ბანკ Societe General-ის მთავარ ოფისთან გახსნა. ამის შემდეგ მან გამვლელი მანქანის მძღოლი მძევლად აიყვანა და მისი მანქანით ელისეს მინდვრებზე გაემართა. მოგვიანებით მან მძევალი გაათავისუფლა.

ბოროტმოქმედის სამძებრო ოპერაცია რამდენიმე დღე გრძელდებოდა. ის ო-დე-სენის დეპარტამენტში დააკავეს. აბდელჰაკიმ დეკარის დნმ-ის ნიმუში დანაშაულის ადგილებზე აღმოჩენილ დნმ-ის ნიმუშებს დაემთხვა. 23 ნოემბერს პარიზის პროკურატურამ მას ბრალი ოფიციალურად წაუყენა. პროკურორმა ფრანსუა მოლენმა განაცხადა, რომ დეკარი „ფაშისტური შეთქმულებისა“ და კაპიტალიზმის წინააღმდეგ იბრძოდა, მედიას კი „მასებით მანიპულირებაში“ ადანაშაულებდა.

დატოვეთ კომენტარი

კომენტარები

Загрузка...