„ბავშვთა სამყარო“ პირველი სავაჭრო ცენტრი არ არის, რომელიც ბოლო წლების განმავლობაში ხანძრის შედეგად განადგურდა.

ქრონოლოგიურად თუ გადავხედავთ, 2008 წლიდან დღემდე, რამდენიმე ხანძარი მოხდა, რომელის გაჩენის მიზეზებზეც სხვადასხვა ვერსია არსებობს.  ყველაზე ხშირად კი დაზარალებულები პოლიტიკურ და ბიზნეს ანგარიშსწორებაზე საუბრობდნენ.

2008 წლის 12 ნოემბერს ლილოს ბაზრობაზე ხანძარი დილის 7:00 გაჩნდა. ადგილზე მისულ მოვაჭრეებს კომერციული ფართები და საქონელი დამწვარი დახვდათ.

ხანძრის ჩაქრობას მეხანძრეები რვა საათის განმავლობაში ცდილობდნენ. ადგილზე სახანძრო სამსახურის 26 მანქანა მუშაობდა. ცეცხლის გავრცელებას ხელი ძლიერმა ქარმა შეუწყო. ხანძრის შედეგად 1 000 კვადრატულ მეტრამდე ტერიტორია დაიწვა. მაშინ მოვაჭრეები ვარაუდობდნენ, რომ ხანძარი სხვა მოვაჭრეებმა სპეციალურად გააჩინეს.

2013 წლის 26 თებერვლის ღამეს ხანძარი სავაჭრო ცენტრ „საბაში“ გაჩნდა. ხანძრის შედეგად 7 000 კვადრატულ მეტრამდე ფართობი დაიწვა.  დაზარალებულებს ამბობენ, მათ გასაყიდი ავეჯი დაზღვეული არ ჰქონდათ, ამიტომ თითოეულმა ათობით ათასი ლარის ზარალი მიიღო.

164 მოვაჭრესთან ერთად, ბაზრობის მფლობელი, ბიზნესმენი პაატა კაჭარავაც დაზარალდა. მომხდარზე სისხლის სამართლის საქმე მაშინვე აღიძრა, თუმცა ერთი წლის განმავლობაში გამოძიება წინ არ წასულა. ის მომხდარს პოლიტიკურ ფაქტორს უკავშირებდა. მან ხანძრის შესახებ ობიექტური ინფორმაციის მიწოდებისთვის 100 000 ლარის ოდენობის  ფულად პრემიაც დააწესა.

2013 წლის ზაფხულში, 16 ივლისს, ღამით ცეცხლი დიდუბეში მდებარე აკვაპარკსაც გაუჩნდა. ხანძრის შედეგად 1000 კვადრატული მეტრის ფართი დაიწვა.

გამოძიების მიერ ჩატარებული ექსპერტიზის შედეგად აკვაპარკში ხანძარი მოკლე ჩართვის შედეგად გაჩნდა. აკვაპარკი სადაზღვეო კომპანია „ალდაგში“ იყო დაზღვეული.

ყურადღებას იქცევს ის ფაქტი, რომ იმავე წლის 22 აგვისტოს თბილისის ზღვაზე აკვაპარკი „ჯინო ფერედაისი“ გაიხსნა.

 

Read more: http://mpress.ge

დატოვეთ კომენტარი

კომენტარები

Загрузка...