აქართველოს მწვანეთა მოძრაობა/დედამიწის მეგობრები განცხადებას ავრცელებენ:

„გვიახლოვდება ბზობის დღესასწაული და ამასთან დაკავშირებით აუცილებელია, მოსახლეობის ინფორმირება იმ საფრთხის შესახებ, რაც შესაძლოა წელს გამოიწვიოს ბზის ტრანსპორტირებამ საქართველოს ტერიტორიაზე.

2010–2014 წლებში ბზის ძლიერი დაზიანება და ხმობა გამოიწვია „ბზის სიდამწვრის“ სახელით ცნობილმა სოკომ  (Cylindrocladium buxicola), ხოლო 2012 წელს სოჭის ოლიმპიური სოფლის გასამწვანებლად შემოტანილ ბზის სარგავ მასალას შემოყვა საშიში საკარანტინო მავნებელი – ბზის ალურა (Cydalima perspectalis), რომელიც 2014 წლიდან საქართველოში აფხაზეთის გავლით გავრცელდა და მოკლე დროის განმავლობაში დასავლეთ საქართველოში, განადგურების პირას მიიყვანა უძვირფასესი მცენარის – ბზის კორომების დიდი ნაწილი. ექსპერტებისა და არასამთავრობო ორგანიზაციების მხრიდან არაერთი გაფრთხილების მიუხდავად (საკარანტინო პროცედურების დაწყების და ბზის ტოტების გადაადგილების შეზღუდვის აუცილებლობის მოთხოვნა), ამ საშიში მავნებლის საქართველოში შემოსვლას, რომელიც მცენარეს სულ რამდენიმე დღეში ანადგურებს, მთავრობის მხრიდან კონკრეტული რეაგირება არ მოყოლია, რის გამოც ბზის ხმობა 2015 წელს უკვე აღმოსავლეთ საქართველოშიც გავრცელდა.

2014 წელს ,,საქართველოს ბუნების დაცვის საერთაშორისო კავშირის“ სატყეო პროგრამის ფარგლებში ჩატარებული გამოკვლევების თანახმად, დასავლეთ საქართველოს ბევრ რეგიონში, მათ შორის – მტირალას ეროვნულ პარკსა და კინტრიშის დაცულ ტერიტორიებზე, ძველი კორომები, ფაქტობრივად, აღარ არის. ამის მიზეზი ბზის სოკოვანი დაავადება და ბზის ალურაა. აღმოსავლეთ საქართველოში შედარებით უკეთესი მდგომარეობაა, თუმცა ბზობის დღესასწაულთან დაკავშირებით დასავლეთ საქართველოდან შემოზიდულ დიდი რაოდენობით დაავადებული ბზის ტოტებს, აუცილებლად შემოყვება ეს მავნებლები და საფრთხეს შეუქმნის არამარტო აღმოსავლეთ საქართველოში არსებულ ბზის კორომებს, არამედ სხვა მცენარეებსაც.

ვინაიდან,  მავნებელი ხასიათდება  მასობრივი გავრცელებით, მაღალი  ნაყოფიერებით, თაობათა დიდი რიცხვით და სამეცნიერო, სახელმწიფო და საზოგადოებრივი ორგანიზაციების მიერ შექმნილი სიტუაცია შეფასებულია, როგორც ეკოლოგიური კატასტროფა.

ზემოაღნიშნულიდან გამომდინარე, საქართველოს მწვანეთა მოძრაობა/დედამიწის მეგობრები მოვითხოვთ:

გამოცხადდეს კარანტინი ბზის ალურის წინააღმდეგ და დაუყოვნებლივ გატარდეს შესაბამისი საკარანტინო ღონისძიებები, კერძოდ: შეიზღუდოს ბზის ტრანსპორტირება და მოსახლეობაში მის გავრცელებამდე ჩატარდეს მცენარეების დამუშავება ბიოლოგიური და ქიმიური პრეპარატებით.

ბზა – ეს არის რელიქტი, რომელიც ათასწლეულების განმავლობაში კოლხური ტყეების განუყოფელი ნაწილი იყო და ჩვენი უპირველესი მოვალეობაა დავიცვათ ის, როგორც მავნებლებისაგან, ასევე ადამიანებისგანაც“ _ ნათქვამია განცხადებაში.

წყარო: postalioni.com

დატოვეთ კომენტარი

კომენტარები

Загрузка...