ყოველწლიურად დედამიწაზე 150 ათასი ადამიანი კვდება. პლანეტის მოსახლეობის ზრდასთან ერთად, ეს რიცხვიც, ცხადია, მატულობს. ახლა დედამიწაზე შვიდი მილიარდი ადამიანი ცხოვრობს, საუკუნის ბოლოს კი ჩვენ 11 მილიარდი ვიქნებით.

გარდაცვლილთა დასამარხი ადგილის პოვნა დღითიდღე სულ უფრო რთული ხდება. მსოფლიოს სხვადასხვა ქვეყანაში მთავრობები ერთი ადგილას მეორე ადამიანის დასაფლავების ნებართვას დღეს უკვე საკმაოდ ხშირად გასცემენ.

ამ ფონზე, სულ უფრო მეტი ადამიანი ირჩევს კრემაციას. თუმცა, სულ ახლახანს აშშ-სა და კანადაში გაჩნდა სერვისი, რომელმაც შესაძლოა სულ მალე ევროპაშიც დაიმკვიდროს ადგილი.

ბიოკრემაცია, – ასე ჰქვია სერვისს, რომელსაც კლიენტებს მსოფლიოში ჯერ მხოლოდ 14 დამკრძალავ ბიუროში სთავაზობენ. მარტივად რომ ავხსნათ, საუბარია ადამიანის სხეულის სპეციალურ ხსნარში მოთავსებაზე, რომელშიც ის დაიშლება.

პროცესი შემდეგნაირად მიმდინარეობს: 1. ადამიანის სხეულს წონიან; 2. 150 გრადუს ცელსიუსამდე გაცხელებულ ხსნარში საათ-ნახევარში ცხედარი მთლიანად იშლება; 3. გაგრილებულ ხსნარს კანალიზაციაში ღვრიან; 4. 129 გრადუს ცელსიუსამდე გაცხელებული ხსნარით კი აპარატში დარჩენილი ძვლები ირეცხება.

ჰიდროლიზის აპარატი დაახლოებით 750 ათასი დოლარი ღირს. ამ ფასში სარიტუალო დარბაზის მოწყობაც არის გათვალისწინებული. ორმეტრიანი აპარატი ცოტათი წყალქვეშა ნავის ლუქს ან ბანკის სეიფის კარს ჰგავს. როგორც აპარატის მფლობელები ამბობენ, ის სხეულის დასაშლელად საჭირო სითხის რაოდენობას გარდაცვლილი ადამიანის წონის მიხედვით გამოყოფს. საშუალოდ, 300 ლიტრ წყალზე საჭიროა 30 კილოგრამი კალიუმის ჰიდროქსიდი.

ჰიდროლიზის დროს სხეული ისევე იხრწნება, როგორც ეს მიწაში ხდება, ერთი განსხვავებით – მთელი ეს პროცესი 3-4 საათს გრძელდება, ნიადაგში კი ათწლეულები გასტანს.

ბიოკრემაციის დროს იშლება მხოლოდ ადამიანის ხორცი. ძვლები აპარატაში რჩება. მათ ნაწილს, გარდაცვლილის ოჯახის წევრების თანხმობით, ხშირად განვითარებად ქვეყნებში პროთეზების დასამზადებლად აგზავნიან. თუ კლიენტს ნათესავს ფერფლის შენახვა ან დაკრძალვა სურს, მაშინ ძვლებს სპეციალურ აპარატში ათავსებენ, რომელიც ძვლებს ფქვავს.

ნიდერლანდებში ჩატარებული კვლევის შედეგად დადგინდა, რომ ჰიდროლიზი, კრემაციასთან და დაკრძალვასთან შედარებით, გაცილებით ნაკლებ ზიანს აყენებს გარემოს. სწორედ ამიტომ ეძახიან მას ეკოკრემაციას.

ადამიანის სხეულის ხსნარში დაშლის დროს, კრემაციასთან შედარებით, შვიდჯერ ნაკლები სასათბურე აირები გამოიყოფა. 2011 და 2014 წლებში ჩატარებულ კვლევაზე დაყრდნობით სპეციალისტებმა დაადგინეს, რომ მიწაში დაკრძალვის შემთხვევაში, გარემოსთვის მიყენებული ზარალი 64 ევროს აღწევს, კრემაციის შემთხვევაში – 48 ევროს, ხოლო ჰიდროლიზის დროს მხოლოდ 2,59 ევროს.

დღეს ჩრდილოეთ ამერიკაში ბიოკრემაცია დაშვებულია კანადის სამ პროვინციაში. აშშ-ში ეს სერვისი ხელმისაწვდომია 14 შტატში, კიდევ 5 შტატში საკანონმდებლო ცვლილებებს განიხილავენ.

ჰიდროლიზის უარყოფით მხარედ შეიძლება ჩაითვალოს სხეულის დაშლის შემდეგ დარჩენილი ხსნარის კანალიზაციაში ჩაღვრა. ეს ბევრს არ მოსწონს, მათ შორის არის ეკლესიაც. როგორც კათოლიკურ ეკლესიაში განაცხადეს, „გარდაცვლილი ადამიანის ქიმიურ ნივთიერებებში დაშლა და შემდეგ დარჩენილი ხსნარის კანალიზაციაში ჩაღვრა ადამიანის ნეშტისაგან გათავისუფლების ღირსეულ გზად ვერ ჩაითვლება“.

სამაგიეროდ, ბიოკრემაცია მოსწონთ ეკოლოგიის დამცველებს. მათ მიაჩნიათ, რომ ადამიანის ცხედრის დაშლის შედეგად დარჩენილი ხსნარი შეიძლება მცენარეების მოსარწყავად გამოიყენო. ამ ხსნარისგან მზადდება სასუქიც.

წყარო: 1tv.ge

დატოვეთ კომენტარი

კომენტარები

Загрузка...