აშშ-ის ვიცე-პრეზიდენტ მაიკ პენსის განცხადებით, შეერთებული შტატები მშვიდობისმოყვარე ქვეყნების გვერდში დგომას არა მხოლოდ სიტყვებით, არამედ ქმედებებით ამტკიცებს.

ასე უპასუხა მაიკ პენსმა ჟურნალისტის კითხვას – დაიცავს თუ არა აშშ საქართველოს რუსეთის აგრესიის შემთხვევაში, საქართველოს პრემიერ-მინისტრთან ერთობლივ პრესკონფერენციაზე.
“პრეზიდენტმა ტრამპმა გამაგზავნა აღნიშნულ ტურნეში, რათა ნათელი გზავნილი მიმეტანა ბალტიისპირეთის ქვეყნებისადმი, საქართველოსა და მონტენეგროსადმი, რომ აშშ გვერდში უდგას მშვიდობის მოყვარე ქვეყნებს. ჩვენ ამას არა მხოლოდ სიტყვებით, არამედ ქმედებებით ვამტკიცებთ. ასი ათასიანი რუსული კონგინტენგის გადასროლა კიდევ ერთხელ იმის დადასტურებაა, რამდენად მნიშვნელოვანია, ნატო-ს პარტნიორები ერთ პოზიციებზე იდგნენ. მე და პრეზიდენტ ტრამპს გვწამს, რომ რუსეთთან უკეთესი ურთიერთობები შესაძლებელია და როგორც პრეზიდენტმა ბრძანა, ამას მომავალი გვანახვებს”,- აღნიშნა აშშ-ის ვიცე-პრეზიდენტმა.
მაიკ პენსის თქმით, იმ სანქციების მეშვეობით, რომელსაც პრეზიდენტი ტრამპი ამ კვირას ხელს მოაწერს, შტატები ნათელ გზავნილს გაგზავნის მოკავშირე ქვეყნების მისამართით, რომ, რასაც აცხადებს, იმას აკეთებს. ვიცე-პრეზიდენტი აქვე ირწმუნება, რომ რუსეთთან დიალოგი უკეთესი შედეგების მომტანია.
“პრეზიდენტი ტრამპი მიიჩნევს, რომ თავის დროზე, ამერიკის პოზიციის არამკაფიო განცხადების გამო, შეიქმნა ეს რეალობა. ამერიკა ავლებდა წითელ ხაზებს და არ მიჰყვებოდა განცხადებებს. ამან მისცა სხვა მხარეებს თავისებური სიგნალი, გაამხნევა ისინი, რომ ემოქმედათ. ჩვენ გამოვდივართ პრინციპიდან – მშვიდობა და სიმტკიცე ჩვენს ქმედებაში. დარწმუნებულები ვართ, რომ დიალოგი უკეთეს შედეგებს მოგვიტანს”,- ანიშნა პენსმა.
აშშ-ის ვიცე-პრეზიდენტი საქართველოში ვიზიტის ფარგლებში, სწავლების “ღირსეული პარტნიორი 2017”-ის მონაწილე სამხედროებს შეხვდება.
მაიკ პენსს, ასევე, შეხვედრები აქვს დაგეგმილი საქართველოს ოპოზიციური პარტიების წარმომადგენლებთან და სრულიად საქართველოს კათოლიკოს-პატრიარქთან.

pia.ge

დატოვეთ კომენტარი

კომენტარები

Загрузка...