აშშ–ის საზღვაო სამხედრო ძალების წყალქვეშა ხომალდი „მიჩიგანი“, რომელიც „ტომაჰავკის“ ტიპის რაკეტებითაა შეიარაღებული, სამხრეთ კორეი სნაპირებთან მივიდა. სუბმარინი აშშ–ის საზღვაო ძალების ხომალდების დამრტყმელ ჯგუფს შეუერთდება, რომელსაც ავიამზიდი „კარლ ვინსონი“ მიუძღვება ჩრდილოეთ კორეის მიმართულებით. უცხოური მედიის ცნობით, ამის პარალელურად ჩრდილოეთ კორეამ საარტილერიო ძალების სწავლებები გამართა. ჩრდილოეთ კორეს დღეს თავისი შეიარაღებული ძალების 85 წლისთავს აღნიშნავს. ტრადიციულად, ამ დღეს ფხენიანი რაკეტების საცდელ გაშვებებს აწარმოებს, თუმცა, სამხრეთ კორეული საინფორმაციო სააგენტო „იონხაპის“ ცნობით, ამჯერად ჩრდილოეთ კორეა მასშტაბური საარტილერიო ცეცხლით შემოიფარგლა. დღესვე აშშ–ის ადმინისტრაციამ უჩვეულო ნაბიჯი გადადგა სენატის სრული შემადგენლობის თეთრ სახლში მიწვევით, სადაც ჩრდილოეთ კორეის ბირთვულ პროგრამას განიხილავენ. მანამდე დონალდ ტრამპმა გაეროს უშიშროების საბჭოს ჩრდილოეთ კორეის „პრობლემის საბოლოოდ მოგვარების“ მოწოდებით მიმართა. საგანგებო თათბირზე, რომელიც თეთრ სახლში ოთხშაბათს გაიმართება, სენატის ზედა პალატის ასივე წევრი მიიღებს მონაწილეობას (ზედა პალატაში თითოეულ შტატს 2 წარმომადგენელი ყავს). თათბირს დაესწრებიან სახელმწიფო მდივანი რეკს ტილერსონი და თავდაცვის მინისტრი ჯეიმს მეტისი. ბოლო რამდენიმე კვირის განმავლობაში ვაშინგტონმა არაერთხელ გამოხატა შეშფოთება ფხენიანის მიერ წარმოებული სარაგეტო და ბირთვული საცდელი ღონისძიებების გამო, რაც საფრთხეს უქმნის როგორც თავად სშშ–ს, ისე მის მოკავშირეებს აზია–წყნარიოკეანეთის რეგიონში. ჩრდილოეთ კორეის წარმომადგენლები აცხადებენ, რომ ნებისმიერი ნაბიჯი, რომელსაც მათ წინააღმდეგ აშშ გადადგამს, „ტოტალური ომის“ პროვოცირებას გამოიწვევს და ფხენიანი მზადაა, ტოტალურ ომს ტოტალური ომითვე უპასუხოს.

დატოვეთ კომენტარი

კომენტარები

Загрузка...