მითოლოგიის მიხედვით, უხსოვარ დროში, ძველ საბერძნეთში, ყოვლისშემძლე ღმერთები _ ჰერმესი და აფროდიტე ცხოვრობდნენ. ძველ რომში მათ „კონკურენციას” მერკური და ვენერა უწევდნენ. ყველაზე ლამაზ ქალღმერთს – აფროდიტეს, ზოგიერთი კიფერეასაც უწოდებდა. ჰერმესმა და აფროდიტემ იპოვნეს ერთმანეთი და თავდავიწყებით შეიყვარეს. ფეხმარდი ჰერმესი ვაჭრობისა და მესაქონლეობის ღმერთი იყო. მოგზაურებსაც მფარველობდა და მასზე მაღლა მდგომ ღმერთებსაც უწევდა შიკრიკობას. ქაფისგან შობილი აფროდიტე კი თავიდანვე სიყვარულისთვის იშვა და ყველა შეყვარებულს ეხმარებოდა სასიყვარულო ინტრიგების ხლართვაში. როდესაც ჰერმესსა და აფტოდიტეს ვაჟი შეეძინათ, ბევრი არ უფიქრიათ და სახელად დედისა და მამის შეერთებული სახელები უწოდეს.

ჰერმაფროდიტი ულამაზესი ჭაბუკი იყო და, რა თქმა უნდა, ერთსქესიანი. ყველაფერი შესანიშნავად იქნებოდა, 15 წლის ჰერმაფროდიტს ყინულივით ცივ ტბაში ბანაობა რომ არ გადაეწყვიტა. ტანზე გახდა და წყალში შესვლა ძლივს მოასწრო, რომ წყლის ნიმფა – სალმაკიდა ეცა და ვნების მორევში ჩათრევა დაუპირა, თან მხურვალედ ეფიცებოდა სიყვარულს. მაგრამ გულგრილად მოიცილა ნიმფა თავიდან, რითაც საბედისწერო შეცდომა დაუშვა. სალმაკიდა საჩივრით აფროდიტესთან გაიქცა. სიყვარულის ქალღმერთმა, რომლის მოვალეობაშიც უიღბლო შეყვარებულების დაცვა და მფარველობა შედიოდა, დაივიწყა თავისი დედური ვალი და შვილს უცნაური სასჯელი დაადო: აფროდიტეს ბრძანებით, ჰერმაფროდიტისა და ნიმფას სხეულები ერთმანეთს შეერწყნენ და ერთ არსებად იქცნენ. ასე გაჩნდა დედამიწაზე უცნაური, ორსქესიანი არსება ქალისა და მამაკაცის სახელით.

წყარო: postalioni.com

დატოვეთ კომენტარი

კომენტარები

Загрузка...