“მოქალაქეთა პოლიტიკური გაერთიანებების შესახებ” კანონში დაგეგმილი ცვლილებების მიხედვით, სახელმწიფომ შესაძლოა ისეთი პარტიებიც დააფინანსოს, რომლებმაც 3%-იანი საარჩევნო ბარიერი ვერ გადალახეს, მაგრამ პარლამენტში ფრაქციის შექმნას მაინც შეძლებენ. ამ ინციატივას არასამთავრობო ორგანიზაცია აკრიტიკებენ. ინფორმაციას სააგენტო ipn-ი ავრცელებს.

საერთაშორისო გამჭვირვალება – საქართველოს ხელმძღვანელის ეკა გიგაურის შეფასებით, ეს მანკიერ პრაქტიკას შექმნის.

“ვფიქრობთ, რომ ზოგადად პოლიტიკური პარტიების დაფინანსება ბიუჯეტიდან მნიშვნელოვანია. მითუმეტეს დღევანდელ პირობებში, როდესაც ოპოზიციური პარტიები კერძო შემომწირველებისგან დაფინანსებას ფაქტობრივად არ იღებენ. თუმცა საბიუჯეტო დაფინანსება დაკავშირებული უნდა იყოს პარტიის მიღწევებთან, რაც გამოიხატება არჩევნებში ნაჩვენებ შედეგებში. ფრაქციის შექმნა კი საპარლამენტო საქმიანობისთვის საჭირო ინსტრუმენტია და არ წარმოადგენს დამატებით მიღწევას. მაგალითად, გასულ წელს მრეწველებმა 0. 78 % ის მხარდაჭერის პირობებში შექმნეს ფრაქცია და მიიღო 300 ათასი ლარის ოდენობის დაფინანსება. ვფიქრობთ, რომ მსგავსი პრაქტიკა უსამართლოა სხვა პარტიებთან მიმართებაში და გაუმართლებელი ხარჯია სახელმწიფო ბიუჯეტიდან. ვფიქრობთ, რომ ეს ცვლილება აკანონებს ამ სრულიად არაგონივრულ პრაქტიკას. ფრაქციის შექმნისთვის პარტიის დაფინანსების პრინციპი მანკიერია, როდესაც ამ პარტიას 3%-იანი ზღვარიც არ გადაულახავს. საპარლამენტო ფრაქციის შექმნა პარტიისთვის დამატებით მიღწევას არ წარმოადგენს. რაც შეეხება ფრაქციის ხარჯების ანაზღაურებას, მისი ანაზღაურება პარლამენტის ბიუჯეტიდან ისედაც ხდება”, – განაცხადა ეკა გიგაურმა.

საკანონმდებლო ინიციატივა უმრავლესობის წევრებს გია ჟორჟოლიანსა და სიმონ ნოზაძეს ეკუთვნის.

დატოვეთ კომენტარი

კომენტარები

Загрузка...