ცხინვალის ოკუპირებულ რეგიონში დაღუპული არჩილ ტატუნაშვილის მამის გამოკითხვა და საქმის მასალების გაცნობა მცხეთის რაიონულ პროკურატურაში დასრულდა.

საქმის ადვოკატის თამარ ავალიანის ვარაუდით, გამომდინარე იქიდან, რომ წინასწარი ინფორმაციით ტატუნაშვილის ცხედარს გარკვეული ორგანოები ამოცლილი აქვს, ამან შეიძლება ძიების პროცესში პრბლემები შექმნას. კერძოდ, ვერ გაირკვეს რეალურად რა იყო ტატუნაშვილის დაღუპვის მიზეზი.

სწორედ აქედან გამომდინარე, მათ ორი მოთხოვნა აქვთ: ცხინვალის მხარემ გადმოსცეს ეს ამოცლილი ორგანოები ქართულ მხარეს, რათა თბილისში ექსპერტიზა ჩაუტარდეს. ასევე გადმოსცეს ტატუნაშვილის გარდაცვალების სხვა დამატებითი სამედიცინო დოკუმენტაცია.

ადვოკატი აცხადებს, რომ გამოძიება მიმდინარეობს ორი მუხლით: თავისულფების უკანონოდ აღკვეთა ორი ან მეტი პირისთვის და მკვლელობის მუხლით, თუმცა ამ მუხლების გარდა გამოძიება ყველა ვერსიაზე მუშაობს.

დღეს ოჯახსა და საგამოძიებო უწყებას შორის პირველი შეხვედრა გაიმართა, რომელიც 8 საათს გაგრძელდა.

არჩილ ტატუნაშვილი 22 თებერვალს, დილით ახალგორიდან გაიტაცეს, 23 თებერვალს, გამთენიისას კი, ოკუპირებული ცხინვალის ინფორმაციით, ის სუნთქვის უკმარისობით გარდაიცვალა.

ტატუნაშვილის ცხედარი ქართული მხარის მიერ კონტროლირებად ტერიტორიაზე 20 მარტს გადმოასვენეს.

ტატუნაშვილი შეიარაღებულ ძალებში მსახურობდა და საერთაშორისო მისიებში გლობალურ მშვიდობასა და უსაფრთხოებას ემსახურებოდა.

imedinews.ge

დატოვეთ კომენტარი

კომენტარები

Загрузка...