ადოკატთა ასოციაციის თავმჯდომარე  ზაზა ხატიაშვილი პარლამენტს ღია წერილით მიმართავს:

,,გუშინ, საქართველოს პრემიერ-მინისტრმა კომიტეტებში წარადგინა მინისტრობის კანდიდატები. მიუხედავად იმისა, რომ დაანონსებული იყო სწრაფი განვითარება, სასამართლო რეფორმა, ადვოკატთა კორპუსის ხელშეწყობა და ა.შ მინისტრობის კანდიდატებად ჩვენ ძველი სახეები ვიხილეთ, რომლებმაც საქართველოში მურუსიძეების სამართალი დააკანონეს, ხოლო ადამიანების წამება აიყვანეს სხვა სიმაღლეებზე. საუბარია იუსტიციის მინისტრობის კანდიდატ თეა წულუკიანზე და შინაგან საქმეთა მინისტრობის კანდიდატ გიორგი მღებრიშვილზე.

გუშინ, წულუკიანის გამოსვლის შემდეგ დამებადა კითხვა, რატომ უნდა დავისაჯოთ იურიდიული საზოგადოება? ისეთი რა ცოდვა მიგვოძღვის, რომ იუსტიციის მინისტრის სავარძელი, ისევ წულუკიანმა დაიკავოს? გუშინ, წულუკიანმა სანდრო გირგვლიანის მკვლელობაზე ისაუბრა, დარბაზში არ აღმოჩნდა ერთი ადამიანი მაინც, ვინც ლოგიკურ კითხვას დაუსვამდა წულუკიანს. რა განსხვავებაა მასსა და მერაბიშვილს ან სააკაშვილის შორის? ორივე მათგანმა გირგვლიანის მკვლელობაში პირდაპირ თუ ირიბად მონაწილე პირები დაიცვეს. გირგვლიანის მკვლელების მოსამართლე ლევან მურუსიძის მოკავშირე წულუკიანი, რით განსხვავდება გირგვლიანის საქმეში მონაწილე სხვა ფიგურებისგან? რა თქმა უნდა არაფრით. იმედი მაქვს, ქალბატონი ირმა ინაშვილი, რომელიც ჩემთან ერთად მონაწილეობდა ლევან მურუსიძის ხელმეორედ დანიშვნის წინააღმდეგ ჩატარებულ აქციებში, წულუკიანთან მიმართებაში ძალიან პრინციპული იქნება.

წულუკიანმა ჩააგდო სასამართლო რეფორმა, თავზე დაგვასვა მურუსიძეები, თუ საქართველოს პარლამენტი არ იქნება პრინციპული წულუკიანთან მიმართებაში ამ ქვეყანას სამართლებრივად განვითარების მომავალი არ ექნება. წულუკიანმა თავის გამოსვლისას აქცენტი გააკეთა, რომ ეხერხება სასამართლო გადაწყვეტილებების წერა, მინისტრობის პერიოდში რამდენჯერმე განაცხადა, რომ მისი დაწერილია გირგვლიანი-საქართველოს წინააღმდეგ გადაწყვეტილება და ა.შ. რაც აბსურდია შემდეგი გარემოებების გათვალისწინებით. 2005 წელს წყალტუბოს პოლიციაში, მერაბიშვილის მინისტრობის დროს, აწამეს რევაზ დვალიშვილი, რომელსაც დვალიშვილის განცხადებით, ორმა პოლიციელმა, ქობულიამ და მჟავიამ წამების შემდეგ კოკა-კოლა იატაკიდან ენით აალოკინა. რევაზ დვალიშვილი სასწაულით გადარჩა სიკვდილს და რამოდენიმე თვე მკურნალობდა. ეს საქმე, როდესაც 2006 წელს, როგორც დვალიშვილის ადვოკატმა ევროპის ადამიანის უფლებათა სასამართლოში გავაგზავნე. იგი მიიღო წულუკიანმა. 2012 წლის დეკემბერში ევროპულმა სასამართლომ გამოიტანა გადაწყვეტილება დვალიშვილის საქმეზე და საქართველო დაადანაშაულა კონვენციის მესამე მუხლის დარღვევაში _ წამება, არაადამიანური, არაჰუმანური მოპყრობა. სტრასბურგის სასამართლოს გადაწყვეტილების დროს, საქართველოს იუსტიციის მინსტრად ორი თვის დანიშნული ბრძანდებოდა თეა წულუკიანი, რომელმაც მიიღო ჩემი საჩივარი სტრასბურგში დვალიშვილის საქმეზე 2006 წელს და მიანიჭა პრიორიტეტი. მაშინ საქართველოს ხელისუფლებამ, როდესაც წულუკიანი იუსტიციის მინისტრი და მთავარი პროკურორი იყო, არ დასვა საბრალდებო სკამზე წამებაში მონაწილე პოლიცილები. მიუხედავად იმისა, რომ წულუკიანის უწყებამ რევაზ დვალიშვილს გადაუხადა 12 000 ევრო კომპენსაცია, არ გაასაჩივრა სტრასბურგის სასამართლოს გადაწყვეტილება. წულუკიანის იუსტიციის მინისტრობის და მთავარი პროკურორობის დროს, მაშინდელმა შინაგან საქმეთა მინსტრმა ირაკლი ღარიბაშვილმა ჩაიდინა საოცრება და რევაზ ქუბულია (დვალიშვილის განმარტებით მისი მთავარი მწამებელი) სტარსბურგის სასამართლოს გადაწყვეტილებიდან 10 თვეში დანიშნა წყალტუბოს პოლიციის სამმართველოს უფროსად, რაც არ გაუკეთებია საქართველოს უახლეს ისტორიაში არცერთ თანამდებობის პირს. დღეს, რევაზ ქობულია იკავებს წყალტუბოს პოლიციის სამმართველოს უფროსის თანამდებობას, ხოლო მჟავია არის წყალტუბოს პოლიციის ერთ-ერთი განყოფილების უფროსი. ჩემი შეფასებით ეს ფაქტი წარმოადგენს პოლიციის მუშაკების წახალისებას, ჩაიდინონ დანაშაული. აწამონ და კოკა – კოლა იატაკიდან აალოკინონ ნაწამებ ბრალდებულებს.

2012 წლის სექტემბრში ევროპის ადამიანის უფლებათა სასამართლომ გამოიტანა გადაწყეტილება საქმეზე მიქიაშვილი – საქართველოს წინააღმდეგ და საქართველო მიქიაშვილის მიმართ კონვენციის მესამე მუხლის დარღვევაში დაადანაშაულა, წამება, არაჰუმანური, არაადამიანური მოპყრობა. ჩემი საჩივარი 2005 წელს მიიღო სტრაბურგში თეა წულუკიანმა. სტასბურგის სასამართლოს გადაწყვეტილების შემდეგ, მაშინდელმა ოპოზიციონერმა თეა წულუკიანმა ჩაატარა პრესკონფერენცია, სადაც საზოგადოებას მიქიაშვილის გადაწყვეტილებაზე და თავის როლზე ისაუბრა. სტრასბურგის სასამართლოს მიერ, მიქიაშვილის საქმეზე გამოტანილი გადაწყვეტილებიდან ერთ თვეში, იუსტიციის მინისტრი თეა წულუკიანი გახდა. მიქიაშვილის საქმესთან დაკავშირებით ლევან მურუსიძის საბრალდებო სკამზე დასმას ვითხოვდი. საზოგადოებას შევასხენებ, რომ ლევან მურუსიძემ გასაუბრებაზე მიქიაშვილის საქმეზე უკანონობის ჩადენა აღიარა, მაგრამ წულუკიანის და სხვათა ძალისხმევით, მურუსიძეების სასამართლო მივიღეთ. წულუკიანი, ოპოზიციაში ყოფნის დროს, მიქიაშვილის საქმეზე გამოტანილი გადაწყვეტილებით იწონებდა თავს, რომელიც მე მოვიგე სტრასბურგში. ხოლო იუსტიციის მინისტრობის დროს, ჩემი შეფასებით, გაურიგდა მიქიაშვილის საქმეში მონაწილე ლევან მურუსიძეს. ტელევიზიების ხელმძღვანელებს ვთხოვ აჩვენონ წულუკიანის 2012 წლის სექტემბრის პრესკონფერენცია მიქიაშვლის საქმეზე, რათა საზოგადოება დარწმუნდეს, ვის ვირჩევთ იუსტიციის მინისტრად.

ვფიქრობ, ასევე ძალიან არასწორი გადაწყვეტილებაა მღებრიშვილის წარდგენა შინაგან საქმეთა მინისტრის თანამდებობაზე. მღებრიშვილის მინისტრობის დროს, პოლიციის დაწესებულებაში აწამეს ადვოკატი გიორგი მდინარაძე, რომელმაც გაბედა და კონსულტაცია მისცა არასრულწლოვან მოწმეს, რომ მას ჰქონდა დუმილის უფლება და შეეძლო. ჩვენება მიეცა დილის საათებში. დღეს, პოლიციის დაწესებულებაში მუშაობს ის პირი, ვინც უკანონოდ დააკავა და ბორკილები დაადო ადვოკატ გიორგი მიდნარაძეს. პოლიციის დაწესებულებაში ჩადენილ დანაშაულზე, რა თქმა უნდა, არ უნდა დადგეს მინისტრის პასუხისმგებლობის საკითხი, მაგრამ თუ სამინისტრო აკეთებს განცხადებას, რომ თურმე ადვოკატი ყოფილა დამნაშავე, ეს უკვე დიდი პრობლემაა. მხოლოდ საზოგადოების დიდი პროტესტის ფონზე მოხდა გიორგი მდინარაძის სავარაუდო მწამებლის დაკავება. ერთი თვის უკან, იმავე პოლიციის დაწესებულებაში ადვოკატ ინგა არახამიას შეურაცხყოფა მიაყენა ვაკე-საბურთალოს პოლიციის უფროსმა, რომელმაც განუცხადა ადვოკატს, რომ იგი იყო პოლიციის შენობა – ნაგებობების მესაკუთრე და რაც უნდოდა იმას გააკეთებდა. ისმის კითხვა, თუ ბატონი მღებრიშვილი არ იზიარებს, პოლიციის მუშაკების ზღვარგადასულ უხეშობას, მაშინ რატომ რჩებიან ეს პირები თანამდებობებზე? ვინ მისცა პოლიციის უფროსს უფლება, თავი გამოაცხადოს პოლიციის შენობა-ნაგებობის მესაკუთრედ? პოლიციის დაწებულებებში, სადაც ადვოკატებს უსწორდებიან, წარმომიდგენია რა მდგომარეობაში იქნებიან ბრალდებულები.

პარლამენტის წევრებო, უმრავლესობა საქართველოს პარლამენტში მოხვდით ჩვენი, ჩემნაირების ბრძოლის შედეგად. მოგმართავთ საქართველოს პარლამენტს! მიიღეთ ყველანარი პოლიტიკური ზემოქმედების ზომები (რადგან კანონიერი ზომების მიღება შეუძლებელია ასეთი კანონმდებლობის პირობებში), რომ მთავრობამ არ წარადგინოს იუსტიციის მინისტრის თანამდებობაზე თეა წულუკიანი, შინაგან საქმეთა მინისტრის თანამდებობაზე კი გიორგი მღებრიშვილი“.

წყარო postalioni.com

დატოვეთ კომენტარი

კომენტარები

Загрузка...