კლუბებში BASSIANI-სა და „გალერიში“ ჩატარებული სპეცოპერაციისას დაკავებული ვიქტორ ჟამუტაშვილისა და ქეთი მურუსიძის ადვოკატების ინფორმაციით, რამდენიმე ბრალდებულის შემთხვევაში დადასტურდა, რომ ნარკოტიკის ნაცვლად ციტრამონს და პარაცეტამოლს ჰყიდდნენ. ამის შესახებ ადვოკატებმა ambebi.ge-სთან ინტერვიუში თქვეს. ინფორმაციას სააგენტო “ინტერპრესნიუსი” ავრცელებს.

ვიქტორ ჟამუტაშვილის ადვოკატის ხათუნა ხურცილავას თქმით, სპეცოპერაციების დროს დაკავებული 8 ბრალდებულიდან სამ ბრალდებულზე დადასტურდა და მტკიცებულების სახითაც იქნა ამოღებული ციტრამონი, ისინი არ ჰყიდნენ ნარკოტიკს.

თავად ვიქტორ ჟამუტაშვილი ისევ დუმილის უფლებას იყენებს, მისი ადვოკატის თქმით, ისინი რეალურ სასჯელზე თანახმა არიან:

“ამოღებულია ნარკოტიკი მტკიცებულების სახით, მაგრამ ვიქტორ ჟამუტაშვილი არ აღიარებს ბრალს. უფრო მეტიც, მე დავკითხე რამდენიმე მოწმე, რომლებიც ადასტურებენ, რომ ვიქტორის დავალებით, ნებისმიერ პირს, რომელიც ნარკოტიკული ზემოქმედების ქვეშ იმყოფებოდა, „გალერიში“ არ უშვებდნენ. გაყიდვაზე ხომ ზედმეტია საუბარი?

ე.წ. მოწმე, რომელიც ჩემი ვარაუდით და სხვადასხვა წყაროების ცნობით, აგენტია, ვერ ჩამოყალიბდა, თვითონ მივიდა პოლიციაში და მათ თანამშრომლობა შესთავაზა თუ პირიქით, აიძულეს თანამშრომლობა. თავადაც ნასამართლევია ნარკოდანაშაულზე. არსებობს კიდევ ერთი მოწმე, რომელიც მე დავკითხე და ის ამბობს, რომ ორჯერ სწორედ ამ აგენტისგან შეიძინა ექსტაზი. ასევე, ერთ-ერთი დაკითხული ამბობს, რომ გლდანის ციხეში ერთად იხდიდნენ სასჯელს ის და ე.წ. მოწმე და ეს უკანასკნელი საპროცესო გარიგებით გათავისუფლდა”, – თქვა ადვოკატმა.

პოლიციის მიერ დაკავებულ 22 წლის ქეთი მურუსიძეს, ადვოკატის, გია გოროზიას თქმით, მისი დაცვის ქვეშ მყოფი ერთ-ერთია, რომლის შემთხვევაშიც დადასტურდა, რომ არა ნარკოტიკს, არამედ პარაცეტამოლს ჰყიდდა.

“არსებობს მტკიცებულებები, რომ არ ყიდდა ნარკოტიკებს, ის ყიდდა პარაცეტამოლს და ამოღებულია პარაცეტამოლი. ეს არის თაღლითობა, რომელიც 4-დან 7 წლამდე თავისუფლების აღკვეთას ითვალისწინებს და მძიმე კატეგორიის დანაშაულია.

ჩემი დაცვის ქვეშ მყოფმა იცის, რომ მძიმე დანაშაულში ედება ბრალი და ძალიან ღელავს ამის გამო. ჯერჯერობით მისი საქმის მოწმეების დაკითხვა არ დაწყებულა და არც საპროცესო გარიგებაზეა საუბარი. ვნახოთ რა იქნება”, -თქვა მურუსიძის ადვოკატმა გია გოროზიამ.

12 მაისის ღამეს შსს-მ თბილისის ღამის კლუბებში სპეცოპერაცია ჩაატარა და 8 ნარკორეალიზატორი დააკავა. კლუბში ჩატარებულ სპეცოპერაციას შეკრებული ახალგაზრდების პროტესტი მოჰყვა.

წყარო: imedinews.ge

დატოვეთ კომენტარი

კომენტარები

Загрузка...